قرأت بالأمس في مدونة مكسوفة موضوع عن الرجل المركوب......!!! و ذلك قبل أن تحذفه و الموضوع منشور بالكامل في الرابط السابق في مدونتي صيد التدوينات من بحر المدونات
و قبلها علقت عندي المهندسة شيماء سحاب مبحره و طلبت مني ان اكتب عن العلاقة بين الرجل و المرأة و كان كلامها كالتالي :
عزيزي بلوجاتى ياريت تتكلم في موضوع مهم جدا
هو التكامل بين اتنين زوجين أو مرتبطين
ازاي ممكن يكون واحد عصبي والتانى هادي مثلا
أو واحد منطلق(نشط جدا) والتانى هادي
أو واحد جاي من بيئه منفتحه جدا والتانى من بيئه منغلقه مثلا
ياعنى لو الأتنين حبوا بعض وحبوا يكملوا الحياه مع بعض
هل دا صح في توافق مابينهم هيفهموا بعض هيريحوا بعض
ايه مدى التواصل مابينهم
وليه في بعض الأحيان بعد كده لما تمر الحياه بيهم بيبص كل واحد فيهم لنص الكوبايه الفاضي(عيوب الطرف الآخر)
ومابيبصش لمميزاته اللي كانت عجباه في الأول
باختصار شديد (لأن ده سؤال بيدور في عقل كتير من الناس )
ياعنى ايه اتنين بيكملوا بعض هل دا معناه ان في كل صفه شخصيه هنلاقي واحد سالب والتانى موجب دا الصح
سؤال يحيرنا لم نجدأفضل من (الباحث عن الحقيقه ) ليجد لنا أجابة عنه
و انا بشكرها على الثقة دي - و بصراحة الموضوعين دول هما اللي شجعوني اكتب لأني بصراحة مش بحب اكتب عن حاجة اتكتب فيها كتير الا لو هضيف حاجة لأني مبحبش التكرار - لأنه مش كلام والسلام
و لأن غالبية المترددين على المدونة من الشباب و خصوصا الشابات في سن الزواج او حديثي الزواج فرأيت أنه قد يكون مفيدا ان اضيف اشياء تغيب عن الأذهان غالبا و لم تأخذ حقها في الكتابة
و سيكون الكلا بشكل غير مرتب لكنه في نفس اطار الموضوع
اولا : موضوع الرجل المركوب او الست المسيطرة او الست سي السيد و الرجل ست امينة
الموضوع كتب كثيرا سواء من وجهة نظر الأوضاع المقلوبة أو من وجهة نظر كوميدية أو من وجهة نظر التشفي في الرجال !!
و أحيانا أصف هذا الرجل بالرجل المدجن (من الدواجن او الفراخ يعني )
بصراحة كثيرا ما كنت أسأل نفسي هل الرجل أيام سي السيد كان سعيدا ؟ و هل كانت المرأة سعيدة ؟
هل المرأة في زمننا هذا سعيدة ؟ هل الرجل الأن سعيد ؟
كنت غالبا ما أصل الى شعور او استنتاج ان الرجل و المرأة زمان كانوا أسعد من أيامنا هذه !!!
لكن هل هذا يعني أن نطبق هذا النموذج الأن ؟؟ لا بالتأكيد لكن الذي أقصده أن الذي نعيشه الأن ليس نموذج لكن نصف نموذج او نموذج مشوه وصل بنا الى أن الطرفين اصبحوا اقل سعادة !!! (انظروا الى ارتفاع معدل الطلاق !!!)
الحقيقة منذ نشأة دعاوي المساواة و الأمر وصل الى صراع بين الطرفين !!
و كذلك الحملة التحريضية في المسلسلات ضد الرجل و كأن المسئلة حرب بين الاثنين فيها منتصر و مهزوم !
و غرض هذه الحملات هو هزيمة الرجل ! وفي الحقيقة ان هزيمة الرجل هي خسارة كبيرة للمرأة !! لأنها ستكون فقدت ساعتها السند و العون !
فالمرأة تظل تنازع زوجها و تأخذ كل ما تستطيع أن تأخذه من الحقوق سواء من حقها او ليست من حقها فيصل بنا الأمر ان الرجل اصبح منزوع الرجولة او ناقصها فاذا احتجنا او احتجتي اليه في شدة أو أزمة لم تجديه !!! لأن تعود على الأتكالية و عدم تحمل المسئولية تعود ان يكون جندي مطيع لا قائد !!!
فالمطلوب من المرأة أن تساعد زوجها على أن يكون قائد حكيم لا جندي مطيع !! و بالطبع لا نريده ديكتاتورا !!
لا يوجد شئ اسمه مساواة لكن هناك تقسيم أدوار و مشاركة في المسئولية ! لا تنازع على من يتخذ القرار !
~~ تعاونوا يرحمكم الله ~~
هناك نزعة فردية مزعجة في الشعب المصري عشان كدة مبنفلحش في الألعاب الجماعية !
الرجل و المرأة عضوين في فريق مثل كرة القدم المدرب و المهاجم والمدافع ولاعب الوسط و حارس المرمى كلهم مهمين و كلهم لازم يتعاونوا و لو واحد قال انا اهم واحد يبقى الفريق كله هيخسر !!!!
كمان لاحظت ملاحظة غريبة الأيام دي : أمهاتنا و من في سنهم رغم انهم نموذج للتضحية و التحمل فانهم يحرضون بناتهم على عدم التضحية و التحمل و لا يشجعوهم على تكرار النموذج !! يعني متغلطوش غلطتنا اننا ضحينا زيادة و خدنا فوق دماغنا !! و في نفس الوقت يطالبون و يلومون زوجات أبنائهم لأنهم لا يقومون بنفس الدور الذي كانوا يقومون به هم !! يعني بناتهم لأ و بنات الغُرب آه !!
يعني الأمهات بتحرض بناتها عل عدم التضحية و التحمل ! و في نفس الوقت بتحرض أبنائها ضد زوجاتهم انهم مش زي الأمهات و انهم متدلعين !
طبعا النتيجة برضه صراع دائم وخلافات لا تنتهي !!!
الأمهات بتربي ولادها على الدلع و بتربي بناتها على الدلع و النتيجة رجال و نساء لا يعرفون معنى التعاون و لا معنى او حقيقة الزواج !!
طبعا انا مش بحمل الأمهات بس المسئولية لكن الرجل ايضا و الست كمان و المجتمع بتحريضه المستمر ضد الرجل و ايضا بالنماذج المستحيلة التي يقدمها للرجل في صورة أمرأة شديدة الجمال و سوبر في بيتها و سوبر في عملها و كمان ليها نشاط اجتماعي ناجح !!!!
هههههههه ياريت اللي يلاقي واحدة زي دي يبقى يقولي !!
بصراحة رغم ميلي الشديد للحلول الأسلامية لكني مختلف تماما في طريقة التناول الحالية التي تكون في صورة حقوق الزوج و حقوق الزوجة !!!! و لما كل واحد يلتزم بحقوق الطرف الأخر الدنيا هتبقى فل !!
و بصراحة شديدة اقول دة كلام فارغ و غير و اقعي بالمرة و كمان ما أنزل الله به من سلطان !
صــــدقـــونـــي لو كل واحد طالب بحقوقه الحياة هتبقى جحيم لأن الواقع و الحياة العملية بتقول ان محدش يقدر يدي كل الحقوق او الواجبات اللي عليه !!! يبقى ازاي يطالب بحقوقه كاملة و هو مش هيقدر يدي التاني حقوقه كاملة !!
المطلوب تنازلات من الطرفين و تعاون بينهم و تفاهم !! compromises , deals , cooperation
ربنا قال عن الزواج : سكن و مودة و رحمة و لم يقل : مساواة و حقوق وواجبات !!!
يعني مش تنافس مين ينجح اكتر او مين ياخد حقوق من التاني اكتر عشان يبقى شاطر !!
نرجع لكلام الأخت شيماء و هي ذكرت كلمة التكامل و ذكرت عرضا كلمة التوافق
بصراحة موضوع السالب و الموجب و ان الشحنات المتشابهة بتتنافر و المختلفة بتتجاذب دة بيضلل التفكير لأن العلاقات الأنسانية أعمق من كدة بكتير فياريت ننسى حكاية الشحنات دي
التشابه بين الاثنين الرجل و المرأة هو الذي يجمعهم (فاكرين المقولة الشهيرة انا و مراتي مفيش بينا أرضية مشتركة و اهتماماتنا مختلفة !!) يعني لازم يكون هناك قدر معين و كبير من التشابه و كذلك قدر من الاختلاف لكن ليس الذي يؤدي للتنافر هو الاخر!
ندي مثال لو واحد هادي وواحدة هادية كويس هينفعوا بشرط بقيت الصفات تكون متوافقة
طيب واحد هادي وواحدة عصبية ممكن ينفعوا و ممكن مينفعوش لو هو قماص و بيشيل و ممكن مينفعوش لأنها هتعتره بارد مبيحسش و هو هيعتبرها عصبية ونشيطة زيادة عن اللزوم او محبكاها !!
طيب لو الاتنين عصبيين ممكن ينفعوا لو مبيتعصبوش في نفس الوقت يعني واحد يشد و التاني يرخي !
يبقى نستنتج انها مش معادلة ثابتة لكن
احب استخدم مصطلح التوافق و التكافؤ
لازم يبقوا متوافقين (درجة تفاهم عالية) و متكافئين (يعني ميبقاش فيه بينهم فروق عالية في أي حاجة مثل : السن , النسب , العيلة , المستوى المادي , المستوى التعليمي , المستوى الثقافي , البيئة أو الثقافة (يعني مثلا بيئة متحررة وبيئة محافظة) , درجة التدين , مستوى الذكاء , الصفات الجسمانية )
لأن الفروقات لما بتزيد بتعمل مشاكل , كمان قصدي بالتوافق توافق الطباع
و يا سلام بقة لو فوق دة كله يبقى ليهم هدف أو أهداف مشتركة (غير الأستقرار والخلفة) يبقى حاجة جامدة جدا !!
نيجي لبعد الزواج و نقطة : وليه في بعض الأحيان بعد كده لما تمر الحياه بيهم بيبص كل واحد فيهم لنص الكوبايه الفاضي(عيوب الطرف الآخر)ومابيبصش لمميزاته اللي كانت عجباه في الأول
ليه بيبص لنصف الكوباية الفاضي لأنه زهق و ملل !
ليه مش بيبص لميزاته اللي كانت عجباه في الأول : لأنه اتعود عليها !
يبقى نصيحة للزوجين بعد الزواج :
انتوا بشر يعني عندكوا صفة الملل و الزهق و كمان صفة التعود , طيب و نعمل ايه ؟ اولا نتفهم طبيعتنا كبشر و نعذر الطرف الأخر و كمان نستحمله لأنه كمان مستحملنا و أيضا التجديد و التطوير من النفس !!
و مفيش مانع احيانا من المصارحة بس بدون عتاب ولا لوم
لابد كل زوج و كل زوجة مينسوش ان كل طرف له :
احتياجات عاطفية
احتياجات جسدية
احتياجات مادية
و الراجل يحسس مراته بالأمان و الزوجة تحسسه بالدعم - يعني انها واقفة جنبه
و هناك كتاب جميل جدا و مشهورهو : الرجال من المريخ والنساء من الزهرة
موجود في اللينك دة الترجمة العربي للكتاب : http://www.4shared.com/file/76229759/730b59d3/____.html?dirPwdVerified=96a803c1
و النسخة الأنجليزي :
Men Are from Mars, Women Are from Venus
http://www.4shared.com/file/76232115/f03d02ff/Men_Are_From_Mars_Women_Are_From_Venus_John_Gray_.html
و هو كتاب مفيد جدا و يعتبر الرجل و المرأة كائنين من كوكبين مختلفين يحتاجون الى ان يفهموا بعضهم جيدا و ان يروا الصورة من جهة مقابلة و كذلك ان احتياجاتهم مختلفة
و الرابط التالي ملخص للكتاب :
و قرائته كل فترة اصبح ضرورة لكل زوجين او مقبلين على الزواج
اكيد موضوع حلو انا قريت مقدمة بس وحبئا اقراة واكملة كويس انك بخير
ردحذفسلام (شيل التدقيق الاملائي)
السلام عليكم :
ردحذفالكتاب ده جميل جدا على فكره رائع بجد لازم كل البنات والولاد يقراؤه انا بعته لكل الى اعرفهم شكرا على الرابط
ميزان
الأخت ميزان
ردحذفو عليكم السلام
أي خدمة !
تحياتي
مرحباااا
ردحذفانا فعلا قريت الكتاب .. و صرت دايما اتعطش له .. و ما استغنى عنه
و انصح الكل بقراءته لأنه ثروه .. و يفيد كثير ف العلاقات الزوجيه
و جزاك الله خير يا بلوجاتي
مفييييييييييييييد
ردحذفجزاكم الله خيراً دكتور محمد،،
السلام عليكم ورحمة الله وبركاته..
ردحذفكلام رائع ومقنع جدا..أهنئك على هذه المدونه..
سيدي الكريم..أتمنى منك المساعده،أنا من برج العقرب وخطيبي برج الدلو،نتفق عمليا جدا ولله الحمد كما وأننا صلينا صلاة الاستخاره وحدث قبول منا نحن الطرفين والحمد لله،أثق وبلا شك ان حياتي ستكون طيبه معه لأن ربي اختاره لي،لاكني قرأت في أحد المواقع أن الرجل الدلو لاينجذب عاطفيا للمرأه العقرب،أسأل الله أن يكون هذا الكلام خاطئا مع خطيبي:-(سؤالي لكل رجال الدلو:هل هذا صحيح؟
:
فرح
انا فرح مره اخرى:)
ردحذفأحببت توضيح سؤالي أكثر..والسؤال كما قلت موجه لرجال برج الدلو:هل حدث وأعجبت بأنثى من برج العقرب؟اقصد عاطفيا وليس عمليا..وشكرا جزيلا مقدما،أعتذر عن الإطاله وأعتذر أيضا إذا كان سؤالي لايناسب هذه الصفحه،،
والسلام عليكم ورحمة الله وبركاته
أختكم:فرح
موضوع الرجل المركوب او الست المسيطرة او الست سي السيد و الرجل ست امينة
ردحذفالموضوع كتب كثيرا سواء من وجهة نظر الأوضاع المقلوبة أو من وجهة نظر كوميدية أو من وجهة نظر التشفي في الرجال !!
و أحيانا أصف هذا الرجل بالرجل المدجن (من الدواجن او الفراخ يعني )
ههههههه وهو فين الراجل ده أغلب الرجالة دلوقت بقوا ذكور مش رجالة
بصراحة كثيرا ما كنت أسأل نفسي هل الرجل أيام سي السيد كان سعيدا ؟ و هل كانت المرأة سعيدة ؟
هل المرأة في زمننا هذا سعيدة ؟ هل الرجل الأن سعيد ؟
كنت غالبا ما أصل الى شعور او استنتاج ان الرجل و المرأة زمان كانوا أسعد من أيامنا هذه !!!
الناس أيام الزمان كانوا سعدا لأن الحياة كانت أهدا والأسعار كانت رخيصة والدنيا حلوة على رأي عبدالوهاب
مش لأن الراجل كان سي السيد والست كانت أمينة
لكن هل هذا يعني أن نطبق هذا النموذج الأن ؟؟ لا بالتأكيد لكن الذي أقصده أن الذي نعيشه الأن ليس نموذج لكن نصف نموذج او نموذج مشوه وصل بنا الى أن الطرفين اصبحوا اقل سعادة !!! (انظروا الى ارتفاع معدل الطلاق !!!)
الحقيقة منذ نشأة دعاوي المساواة و الأمر وصل الى صراع بين الطرفين !!
و كذلك الحملة التحريضية في المسلسلات ضد الرجل و كأن المسئلة حرب بين الاثنين فيها منتصر و مهزوم !
الطلاق مسئول عنه الأتنين الراجل والست وزي ما الستات مبقوش زي زمان الرجالة كمان مبقوش زي زمان
الراجل زمان كان ليه هيبة ومحترم يعرف ازاي يقوم بحق بيته وياخد باله من الست اللي معاه ويحترمها ويحترم مشاعرها يعني كان بيقدم السبت عشان يلاقي الحد وبالتالي الست ايام زمان مكانتش تقدر تستغنى عن راجلها لأنه لو جه يوم وزعلها مثلا في لحظة نرفزه فهي فاكراله حاجات كتير كويسة
وبعدين فعلا في حملة من الإعلام بس على الستات مش الرجالة دايما تظهر الحبيبة او الزوجة مخلصة ومضحية حتى بحياتها عشان البطل يعيش - وده طبعا كلام أفلام -
وفي الآخر برضه تلاقي البطل شمر عن دراعاته وضربها قلمين وبرضه ياغيني تفضل تحايل وتصالح في جنابه
ده مين البطلة الوهمية دي ؟
دي واحدة يا إما هبلة يا إما بتكره نفسها
ومش معنى كلامي ان مبقاش في رجالة لأ لسه في بس قليلين يعني مبقاش في راجل تحس انه جنتل مان بحق وحقيق
زي ما الستات الكويسين بقوا قليلين برضه معادش في البنت الهانم اللي تمشي على الأرض هونا بوقار واعتزاز
فاتن
الحقيقة منذ نشأة دعاوي المساواة و الأمر وصل الى صراع بين الطرفين !!
ردحذفو كذلك الحملة التحريضية في المسلسلات ضد الرجل و كأن المسئلة حرب بين الاثنين فيها منتصر و مهزوم !
احنا مش في أمريكا عشان نعمل حملات مساواة
الحملات اللي ظهرت في مصر منقدرش نقول عنها مساواة حتى لو الناس سمتها كده نقدر نقول عنها حملات حقوق
زي حق المطالبة بتعليم البنات في الصعيد وحق المرأة في العمل ان ارادت في مجال تحبه
وحقها انها ترفض المعيشة مع راجل بيهينها
انما انا عمري ماسمعت عن جملة من دول بتقول لو جوزك كويس وابن ناس اديله على قلبه
و غرض هذه الحملات هو هزيمة الرجل ! وفي الحقيقة ان هزيمة الرجل هي خسارة كبيرة للمرأة !! لأنها ستكون فقدت ساعتها السند و العون !
الراجل اللي يقبل الهزيمة على كرامته زي ما الست اللي بتيجي على كرامتها وبتدي كل حاجة من غير مقابل
الاتنين معدومين الكرامة ولايعتمد عليهم
ولاهو ينفع نسميه راجل ولاهي تنفع تبقى إنسان
فاتن
فالمرأة تظل تنازع زوجها و تأخذ كل ما تستطيع أن تأخذه من الحقوق سواء من حقها او ليست من حقها فيصل بنا الأمر ان الرجل اصبح منزوع الرجولة او ناقصها فاذا احتجنا او احتجتي اليه في شدة أو أزمة لم تجديه !!! لأن تعود على الأتكالية و عدم تحمل المسئولية تعود ان يكون جندي مطيع لا قائد !!!
ردحذفلو الراجل قائد بحق وحقيق ومدي للست كل حقوقها وبيحترمها وبيعاملها بما يرضي الله هي هتعوز منه ايه تاني ؟
فالمطلوب من المرأة أن تساعد زوجها على أن يكون قائد حكيم لا جندي مطيع !! و بالطبع لا نريده ديكتاتورا !!
أغلب الرجالة دلوقت ومش كلهم بس كتير منهم مش عاوز يبقى سي السيد ولا عاوز يبقى ديكتاتور ولا حتى قائد
ده عاوز يبقى دراكولا مصاص الدماء والمرأة هي الخادم المطيع
ليا واحدة صاحبتي جوزها كان مانعها عن زيارة أهلها ؟ مع ان اهلها محترمين وبيعاملوه كويس جدا
تاخده بالمسايسة مش نافع بالخناق مش نافع
طيب ليه يابن الناس ؟ من غير ليه هو كده كلمتي تنسمع من سكات
ده اسمه قطع ارحام ؟ قالها أما تعبديني كأنك بتعبدي ربنا
وكان بيسكتها طبعا بحديث الرسول المشهور ( لأمرت المرأة أن تسجد لزوجها )
بس هل جوز صاحبتي ده يستاهل السجود ؟ أكيد مش ده الزوج اللي يقصده الرسول
وفي الآخر فضل يتلككلها لحد اما طلقها وطردها في انصاص الليالي بالجلابية اللي عليها
يمكن تقولي ان ده حالة شاذة بس لو رحت المناطق العشوائية أو جيت عندنا في الأقاليم هتلاقي من صاحبتي دي كتيييييييييير
لا يوجد شئ اسمه مساواة لكن هناك تقسيم أدوار و مشاركة في المسئولية ! لا تنازع على من يتخذ القرار !
~~ تعاونوا يرحمكم الله ~~
هناك نزعة فردية مزعجة في الشعب المصري عشان كدة مبنفلحش في الألعاب الجماعية !
عليك نور موافقاك في الحته دي
كمان لاحظت ملاحظة غريبة الأيام دي : أمهاتنا و من في سنهم رغم انهم نموذج للتضحية و التحمل فانهم يحرضون بناتهم على عدم التضحية و التحمل و لا يشجعوهم على تكرار النموذج !! يعني متغلطوش غلطتنا اننا ضحينا زيادة و خدنا فوق دماغنا !!
مين اللي قالك ان ستات زمان خدوا فوق دماغهم ياريتني عشت زمان
ده كفاية انسانية الراجل في التعامل مع مراته وكلامه الحلو واحتضانه لمراته ومعاملته الحسنة
وامهات زمان ستات واعيين عارفين ان الراجل دلوقت في الغالب برضه مش هنعمم مبقاش زي زمان ومفيش ام ترضى لبنتها الإهانة
بس منقسمين شقين شق منه بتطالب بنتها بالتحمل عشان ماترجعش متطلقه والناس تاكل وشهم
وجزء بيبقى عنده الشجاعه انها ترفض اهانة بنتها بس المشكلة انها أحيانا بتلاقي البنت هي اللي قابله الإهانة على نفسها وردها بيكون بحبه ياماما
مش معنى كلامي ان مفيش حموات رخمين بيدخلوا في حياة بناتهم وده غلط أكيد بس زي ما في ده في ده
ولو الراجل كويس وبيعامل البنت كويس الأم هتعوز ايه ؟ غاوية تخرب على بنتها مثلا
و في نفس الوقت يطالبون و يلومون زوجات أبنائهم لأنهم لا يقومون بنفس الدور الذي كانوا يقومون به هم !! يعني بناتهم لأ و بنات الغُرب آه !!
تيتا ام أبويا حماة أمي يعني
امي دايما تقولي عنها ياريت كل الحموات زيها ده كفاية لسانها الحلو ومقابلتها الأحلى
بلاش تيتا لأنها من زمن شوية
خالتي ابنها متجوز معاها ومراته معاها في نفس البيت
مرات ابن خالي دايما تقول عن خالتي دي أحن عليا من أمي ولو قامت مشكلة بيني وبين جوزي بتقف في صفي
صحيح الحموات الكويسين عملة نادرة دلوقت بس أي حاجة كويسة في زمننا ده عملة نادرة
المجتمع بتحريضه المستمر ضد الرجل و ايضا بالنماذج المستحيلة التي يقدمها للرجل في صورة أمرأة شديدة الجمال و سوبر في بيتها و سوبر في عملها و كمان ليها نشاط اجتماعي ناجح !!!!
هههههههه ياريت اللي يلاقي واحدة زي دي يبقى يقولي !!
اسم الله عليك أغلب الرجالة دلوقت عايزين نانسي عجرم
ونسي انه حتى لو لقى نانسي عجرم لازم يبقى هو عمرو دياب
فاتن