رجل برج الدلو كلاكيت ثالث مرة !!!

رجعت مرة أخرى و أرجو أن تكون أخيرة لرجل برج الدلو و السبب الرئيسي أني أريد أن أنقل الصورة التي يراه بها الناس حتى يرى صاحب البرج بالدرجة الأولى كيف يراه الناس من الخارج و يرى أيضا القدر الذي يسببه من ألم للآخرين و خصوصا الذين يحبونه - فكل الكلام الأنتقادي هنا صادر من أناس يحبونه و يطلبون رضاه !

و أيضا السبب الثاني هو أن شرحي لمبرراته و تفسراته و نفسيته أي رجل برج الدلو أظهرني بمظهر المدافع بل و أحيانا المنحاز و بما ان هذا ليس قصدي أبدا و ليست حقيقتي , ورأيت أن تبريراتي قد لا تدفع صاحب البرج للتغيير الكافي و اللازم فرأيت أن أنقل بعض الآراء التي تراه من الخارج أو التي تحمل نظرة سلبية له و أيضا بعض الردود مني و ليس بغرض الدفاع لكن بغرض مساعدة من يتعاملون مع صاحب هذا البرج للتعامل معه بشكل أكثر كفاءة - لأن أحيانا يكون صاحب البرج لم يقرأ ما أكتبه فلا يوجد لدينا فرصة غير الذي يتعامل معه كأمل أخير لتحسين العلاقة -

و الكلام المكتوب باللون البني سيكون موجها لصاحب البرج و هي شكاوى منه و من تصرفاته أو وصف له - وهي على لسان الأخرين -

و التي باللون الأسود موجه بالدرجة الأولى للمتعاملين معه عسى أن يساعدهم هذا الكلام أو هذه النصائح في التعامل البناء أو الأيجابي معه أو رسم صورة عنه تساعدهم في التعامل معه - و هي من كتابتي أنا -

خفيف الدم بس لما ياخد عليك شوية

بيقدر يخرج اى انسان من حالته السيئه

رجل الدلو معندوش كاريزما (كاريزما النظرة الأولى) لكن عنده جاذبية مع العشرة

ليه بتبقى فاكر المناسبات لكن مبتجاملش ؟

لما كلمني نرفز علي وقالي لو بقيتي على هالأسلوب من الزن والنكد احنا ما نستمر انتي شو مفكرة الدنيا كلها حب وعواطف ولا عايزاني ابقى اكلمك وقدامك اربع وعشرين ساعة

أولا رجل الدلو : فعلا بيبقى حاسس انك السبب في انه فقد العزوبية - و زي مقولنا لازم تديله حرية و ما تطالبيه بالتزامات او طلبات (يعني تهوني عليه الامر و تحسسيه انه حر مثل الأول تمام كل الحكاية ان جاله صديقة و رفيقة وديعة ورقيقة تلطف الجو و تكون الجانب الحلو في الحياة)

بلاش تكلميه في الحب - اديله فرصة يتكلم عن اراؤه في الحياة بشكل عام و عن طموحاته في العمل بشكل خاص - لازم يحس انك بتقدريه - بس بلاش مبالغة
المشكلة انك داخلة في جو الحب بسرعة و دة بيقلل من مصداقية هذا الحب في نظره لأن الحب بياخد وقت من وجهة نظره فلما سيادتك بتكلميه في الحب بسرعة كدة بيحس انه كلام جاهز لأي حد هيكون في مكانه لأنك ببساطة لسه متعرفيهوش - عشان كدة لازم تعرفيه أكثر يقوم يحس ان حبك منطقي انك عرفتيه عن حق و بتقدرية مش مجرد كلام مجاملة وحب يتردد ليل و نهار

فكري معاه بصوت عالي عن المستقبل و عن الحياة بشكل عام - انتي رفيقة حياته و زوجته مش مجرد حبيبه فقط

الخلاصة قللي من جرعات الحب و اديله فرصة يحبك عشان ميقاومش الحب

اتكلمي في كل المواضيع مش الحب بس

لازم تحسسيه انك فاهماه مش بس حباه

اسأليه ببساطة عن اللي بيحبه و اللي بيكرهه وهو هيقولك بكل بساطة وانتي لازم تنفذي


اعطيه مساحة من الحرية عشان يحبك يعني بلاش تحاصريه بالحب و الاهتمام

لكن زوجي ولأن طبيعته كدلو فهو دايما يحبطني بتلعيقاته الجارحة ما قدر في يوم يمدح شي بالعكس ودايما في انتقاد مستمر لدرجة اني افكر دايما ليش اختارني

ولم اصلا يدخلون بل ويقتحمون عالمك ويفعلون كل ما يستطيعون ليلفتوا انتباهك وعندما يحصلون على انتباهك وقلبك يهملونك بل ويقسون عليك وكأنهم يعاقبونك على حبك وطيبتك معهم

قاللي انا مشغول في اولويات بالحياة الحياة مش كلها حب وغرام اصحي انتي مش مراهقة انتي تريدين علاقة مثالية

وبعدها قاللي انا اللي اسويه عشان مستقبلي وعندي اولويات لازم اهتم فيها

اريد اعرف ليش برج الدلو يتخذ فجأة قرار انه يلغيك من حياته بدون ما يقدم اسباب حتى

هل بحق يريد الرجل هذا من المرأة؟؟؟ يريدها تصبر وتتحمل وتتبع وتشجع ولكن .. تجد الكثير من الرجال يشعرون بالممل منها ويذهبون للبحث عن الحب المجنون والعاشقة المشاكسة، وان كانت زوجتهم هي الحب المجنون والمشاكس، تذمروا وارادو الملاك الحنون الهادئ التابع ،،،ترى بصدق هل يكفي الرجل ان يكون عنده الأثنان أم انه سيبحث في النهاية عن مواصفات ثلاثة لتبرير هواية البحث عن المجهول ؟؟؟؟

بصراحة احتمالية ان رجل الدلو يقدم على الارتباط و هو في ازمة مالية بيبقى ضعيف جدا

عواطف رجل الدلو بتكون غير ناضجة مثل الثمرة الخضراء غير الناضجة مرة الطعم - لكنها عندما تنضج تكون أحلى من العسل !

وبعد مايعمل المشكلة يقول انا مش كده خالص انا هادى وطيب وحنين وعايز مراته تكون عبدة ليه ولرغباته مش مهم هى عايزة ايه دايما حاسس ان هو بيدى وبيضحى وان اللي قدامه انانى ومش بيديه الى هو عايزه ابدا مهما تعمل عشانه جابلى جنان شويه يقولى انا محتاجلك خليكى جنبى وفى لحظه يحسسنى انو مش طايقنى ولا طايق كلامى ولا تصرفاتى

فيه نقطة عايز اوضحها و هي ان رجل الدلو لما بيبقى مضايق و مش طايق اللي قدامه بيبقى كمان مش طايق نفسه - اديله مساحة من الحرية يغضب فيها و بعدين هو هيروق لوحده , كمان متخديش الموضوع دة بشكل شخصي يعني هو مش متضايق منك انتي شخصيا بس معلش عشمان فيكي و انتي اللي جيتي في سكته

بس بلاش تحسسيه ان مستوى حبه او معاملته قلت ! لأن دة بيحسسه انك مش هامك المشكلة او المصيبة اللي هو فيها و كل اللي هامك الحب !! عشان كدة بينتقدك و بيتهمك بالأنانية !

بجد مش ممكن الدبش والطوب الى فى كلامو انا بحس انى كل مااتنازل اكتر كل ماهو يزيد عندو اكتر كل ما احاول اريحو يطلع بطلب تانى غريب

انتقاده المستمر لكل حاجه اعملها واحساسه انى ناقصه دايما بيجرحنى وماقدرش حتى اقولو كده لانو بيقلب عليا فى لحظه ولو طلب منى حاجه ومعملتهاش بيقلب قلبة مايعلم بيها الا ربنا

وفجأة اتقلب من خطأ ماليش اى علاقة بيه كليا وابتدى يحدفنى بطوب زى ماينفعش نكمل مع بعض وحاجات كده ونسى كل الحلو الى بينا فى ثانية وعايز يظلمنى ومردش ويجرحنى ومعاتبش

بالنسبة لرجل الدلو و انه يقفل على الخلافات الصغيرة لازم اقول على حاجة مهمة جدا عشان ابقى عملي و بلخص :

الوقاية خير من العلاج ! اعرفي ايه اللي بيضايقه و متعمليهوش دة افضل من انك تسأليني اعمل ايه عشان اصالحه
ثانيا : لازم تعرفي وجة نظره في الخلافات الصغيرة دي لأنه بيبقى ليه وجهة نظر كبيرة لازم تلتفتيلها عشان تفهميها و تفهمي شخصيته
كمان المفروض الدلو مش بيقفل قوي كدة الا لو كلامه متنفذش دة بينفزه جدا و كمان اللي بيكبر الموضوع انه بيبقى فاكر انك قاصدة تعانديه و دة بيأخر و يصعب عملية المصالحة
ثالثا : افضل طريقة لمصالحته هية انك تقوليله مش هعمل كدة تاني (وتنفذي) و تديله بوسة و تمشي

ايوة لما بيكون عنده مشاكل في الشغل بيبقى خلقه ضيق جدا- بلاش تشغليه بالتفاهات-
لما الوضع يتحسن في العمل هيهدى - بس الشغل الأيام دي كله مشاكل و مش بتنتهي و الدنيا على دا الحال -

نصيحة آخيرة و الكلام دة مش بقوله غير لما احس ان اللي قدامي شخص ذو عقلية :
حاولي تفهمي فلسفته او المغزى من أوامره بس بعد متنفذيها - و ممكت تسأليه عن دة لما يكون رايق - صدقيني هتلاقي نفسك بتسمعي كلامه و انتي نفسك مفتوحة لأنه بجد بيحسبها كويس -بس هوة لما بيكون مضغوط بيبقى معندوش خلق ولا وقت يوضح ليه هو بيطلب الطلبات دي فبيبقى عايز الناس تنفذ و خلاص

لازم تعرفي ان برجه برج متقلب لوحده فياريت متاخديش انفعاله او حدته او نرفزته بشكل شخصي - ماشي؟ -ليه لأن دة هيتكرر كتير من رجل الدلو

انا هديكي مثال بما اني رجل من برج الدلو :
انا لما بكون متنرفز من حاجة و اشتغل على الكومبيوتر و حاجة تضايقني في جهاز الكومبيوتر او السيرش بفضل اشتم و ازعق للجهاز !!!!! اكيد انا مش بكره الجهاز و لا حاطط نقري من نقره ههههه
انا بس ببقى متنرفز و بفضي شحنة
بس الحمد لله الجهاز مش بيضايق مني - مش لأنه جماد لأكن لأنه فاهمني كويس هههههه-

يعني متاخديش على كلامه و هو عصبي - كمان اوعي اوعي تردي عليه وهوة متنرفز لأنه عنده سرعة بديهة فظيعة و هيرد عليكي ردود قوية و جارحة -محدش هيعرف يغلب الدلو اذا دخل معاه في مباراة في الكلام الجارح -
(بقيت الأبراج بترمي طوب لكن الدلو بيرمي سكاكين حادة و بيعرف ينشن !!!)

ومنكرش مميزاته كمان

بس قيمتها اية وانا فى لحظة برة حياته وحاسة انى على المحك دايما ...

اسمعيله كويس و خليه يبقى استاذك و معلمك - الصفة دي عند الدلو و بيحبها جدا و بتديله أمل في ان مراته هتتصلح او تتطور - بجد هتكسبيه بالطريقة دي

تخيلي انك متجوزة عمر المختار مثلا - مش أكيد كنتي هتقعدي تسمعيله و تخليه يعلمك ؟ الدلو بشكل عام ذو ثقافة موسوعية و غالبا بيبقى عنده فلسفة في الحياة - اتعلميها منه دة هيقوي علاقتكوا و كمان هيخليكي تبقي هادية في التعامل معاه و هتثقي فيه أكتر

حكاية انك بتقوليله بحبك و هو بيرد شكرا ضحكتني هو دة الدلو بعينه برزالته ههههه تيبيكال

زوجته بيحب انها تكون :
حبيبته + عشيقته + صديقته + حنية أمه + تلميذته + مستشارته
وليفته شريكة عمره و مصدر السعادة الرئيسي في حياته !
شوفتي مستني من مراته ايه؟ عشان كدة بيزعل لما مش تسمع كلامه لأنه بيبقى معشم فيها قوي

هي طبعا أنانية بس الرجالة كلهم كدة مش الدلو بس

وخصوصا انه رجل وحنين وهيكون اب ممتاز ..ده حقيقى فعلا

.خناقات سببها هااااايف للاسف ويعد فى الاخر يقول انا مش عايش مبسوط ومش هينفع
الاول كنت اتشال وانحط لانه ...ازاى يقولها بالساهل كده
وادخل معاه فى حوارات طويلة مايثمرش بشئ

وده لان الدلو ليه سحره وله جاذبيتة ومش ببساطة نستغنى عنه لان زى ما فى لحظة بيخلينى اضرب راسى فى الحيط ...فى لحظة تانية بيسعدنى سعادة كبيرة ....(وده بس لما يكون راضى)
وهنا يجى بيت القصيد (انا بشوف ان ده عيب وميزة ف نفس الوقت)
ميزة لانك عرفتى الحل عشان تريحى وتستريحى وعيب لان دى انانية لان بتكونى مجبرة انك تراضية ياما حياتك هيهدها فوق دماغك ...ودماغة وهو كده

طبعا التهديد بالأنفصال كل شوية شئ مش كويس و مؤذي جدا - بالمناسبة انا عاوزك تقوليله حاجة من فضلك - قوليله بهدوء شديد : فكر كدة ايه هيكون احساسك لو انا كل شوية قلتلك لو معملتش كدة يبقى نتطلق او طالبتك كل شوية بالطلاق فكر شوية في احساسك هيكون ايه ساعتها و بعدين شوف انت ممكن تكون بتسببلي ايه؟؟

هتطلبي منه حاجتين
اولا انه يقول كلام حلو من حين لأخر و ليكن تتفقوا على يوم في الأسبوع ينسى فيه هموم الشغل و يطلع فيه من المود اجباري ! و عشان نبقى واقعيين هنخللي اليوم دة لما ييجي و ليكن يوم الأثنين من كل أسبوع لو هو مش قادر ممكن يتأجل بحد أقص تلات تيام عشان ميحسش انه مضغوط و بالعافية !
و تفهميه ان دة في مصلحتكوا انتوا الأتنين
و تطلبي منه انه من حين لأخر يفهمك أوامره بتبقى ليه يعني يفسرها و تفهميه انك بشر و تذكريه بسيدنا أبراهيم عليه السلام :
((قال رب أرني كيف تحيي الموتى قال أولم تؤمن قال بلى ولكن يطمئن قلبي))

قوليله لما اكون بطلب أفهم مش معناها اني مش واثقة فيك لكن انا بشر ومحتاجة أطمن

و تفكريه بسيدنا الخضر عليه السلام في سورة الكهف :
((قال انك لن تستطيع مع صبرا * و كيف تصبر على مالم تحط به خبرا))
يعني الواحد لو مفهمش ليه دة بيحصل مش هيقدر يصبر !!!

كلمات على لسان رجل من برج الدلو :

صدقيني صدقيني
الزواج اكبر من الحب
الزواج الناجح او الزوج الصالح شئ ملموس ممكن تحقيقه - ولو بصعوبة-
لكن الحب -في صورته الرومانسية - ممكن يكون وهم كبير !

اسمحيلي اتكلم بلسانه
انتي بتتكلمي عن الحب - انا بكلمك عن واحد ممكن يفديكي بروحه !
لو فيه رصاصة جاية ناحيتك و مفيش حل عشان متجيش فيكي غير اني اخدها هاخدها بدالك بدون ترد و بدون تفكير !
انتي شريكة عمري و دة عندي اكبر من انك تكوني حبيبتي
يمكن اكون بحبك بطريقتي
يمكن انتي اللي مستعجلة حبي
يمكن شكك فيا بيخليني اهرب من حبك

الحب في القلب لكن انا حاسك جوة في كل كياني !
ثقي فيا شوية لأن عدم ثقتك بيقطعني

اما عن ان كلمة الرومانسى ذى الرصاص ف دى حقيقة انا مرة قال لى "انا ماكونتش متخيل انى ممكن احبك انتى"
انا بس عايزة اعرف اتعامل معاه ازاى لما بفضل ينتقد فيا عشان بحس وقتها انه مش طايقنى و مفيش حاجة عجباه فبتنرفز غصب عنى ف اعمل ايه؟

أقولك تعملي أيه في موضوع الأنتقاد

أولا لازم تستجيبي لبعض الحاجات اللي لفت نظرك ليها - و خصوصا انه غالبا معاه حق !!-
ثانيا الفتي نظره ان الأسلوب مهم و ان لما الأسلوب يكون كويس بيساعد و بيشجع على التغيير
كمان لازم تعرفي اني دي طبيعة رجل الدلو مش راضي ! كمان هو بينتقد نفسه أكتر ما بينتقدك !!!
كمان هو مش بيبقى قاصده غير انك تبقي أحسن و انه يساعدك انك تتطوري - لأنه شايف ان دة احد واجباته ناحية اللي بيحبهم
كمان لما بيقولك ملاحظات فهو بيقصد ان حبك هيزيد في قلبه لو عملتي اللي هو طلبه !

انا لازم افهمك حاجة - رجل برج الدلو مش سهل التعامل معاه يعني هو عايز معاملة خاصة و صبر ياما بلاها دلو خالص

انتي لزم تساعديه يفهم نفسه و يفهم ان مشاكل الدنيا و مشاكل الشغل مبتنتهيش - و اننا لازم نمشي كله مع بعضه الشغل مع الحب و ان الحب هو اللي بيخفف عننا

و متزعليش منه اللي بيعمله دة مش دليل انه مش بيحبك لأن دة العادي بتاعه لما بيكون ظروفه وحشة بيحب ينعزل –

بيغير شغله كتير – تقريبا أكتر واحد بيغير شغله ! و هو عارف و حاسس أن أكتر حاجة تناسبه انه يبقى عنده شغل خاص بيه

رجل الدلو يفضل الصداقة ويتهرب من الحب والزواج اي الارتباط عموما هي دي المسألة باختصار وببساطة الي عندها طولة بال تقرب منه والي ماعندهاش تبعد احسن لانه غريب ومتناقض وبارد والسلبيات دي مش اي حد هيقدر يستحملها

موضوع عدم الرد عند الأتصال احيانا - فدي واحدة من الصفات السيئة المتكررة عند رجل برج الدلو - و غالبا مش بتتغير - و سببها انه بيبقى مشغول ذهنيا وعصبيا في حاجة و بيتقوقع على نفسه فمش بيرد على حد
لازم نعرف ان دي احدى وسائله - يعني التقوقع - عشان يعرف يتوازن نفسيا لأنه لما بيكتئب و مفيش حاجة تخرجه من الاكتئاب بتقوقع لحد ميتعافى ويرجع لتوازنه
this is the way he get recovered & selfmotivated

هو بالتأكيد الدلو هيجننك - عادي جدا و دة مصير اللي يقرب من رجل الدلو ههههههههه

هو دة سر جاذبيته تقلباته و مفاجئاته و جمعه البارع بين المتناقضات !

الواحدة اللي بتيجي مع الدلو بعد قصة حب فاشلة بتبقى حظها وحش شوية - لأنه بيبقى مش مستقر عاطفيا و بيبقى مش عارف اذا كان حب الجديدة فعلا و لا هو حبها عشان هو محتاج حبها - و كمان بيفتكر القديمة و خصوصا لما الجديدة بتضايقه
معلش كلامي مش لطيف بس انا لازم ابقى صريح معاكي

احيانا بيكون الحل هو صدمة جديدة بان الجديدة هي كمان تسيبه - و ساعتها هيعرف قيمتها - بس قبل منعمل كدة لازم نديله فترة نعامله فيها بطريقة مثالية زي مهو عايز و اكتر و بعدين فجأة نمنع كا حاجة عنه غير المعاملة العادية

هو بيحب طبعا اللي يهتم بيه بدون مبالغة و بيحب الحرية و بيحب اللي يحبه و عايز اللي يفهمه و يقدره و يستحمله
لكن مشكلته انه مش ناضج عاطفيا و مكانش تحصله صدمة عاطفية فعواطفه بتفضل غير ناضجة
احيانا كتير بيكون الحل معاه هو اعطاءه جرعة كبيرة من الحب و الحنان و الرعاية و الاهتمام لمدة شهور- ستة شهور مثلا - ثم نمنعها عنه فجأة و ان تعامليه ساعتها عادي لفترة لحد ميعرف قيمتك و تلاقي طريقته اتغيرت معاكي

هو ممكن يحب واحدة مش معبراه لكن أعمق حب له هو للمرأة التي تحبه و تعطيه كثيرا بدون طلب مقابل - بس بشرط يكون حاسس بتجاذب ناحيتها او فيه شرارة او فيه حاجة يتحصله لما بيشوفها

احنا قلنا كتير ان رجل الدلو و كذلك بقية الرجالة بس بشكل أقل من الدلو
لما بيكون عنده مشكلة بيتقوقع على نفسه و بيحب ينعزل لأن العزلة دي هي اللي بتخليه يعرف يرجع لطبيعته - حاجة كدة زي البيات الشتوي –

أنصح رجل الدلو بالأستماع أكثر للآخرين و عدم التحرج من سؤال الآخرين عن خبراتهم لأنه للأسف قد يتحرج أو ممكن يترفع من أن يسأل آخرين عن خبرات لديهم هو نفسه معترف بوجودها لديهم و معترف بحاجته لهذه الخبرات - خذ خطوة فهناك خبرات لا تقدر بثمن و تستحق أن تقلل من نفسك بعض الشئ للحصول عليها من أصحابها

فلا تجعل اعتدادك بنفسك و بآرائك يمنعك من طلب هذه الخبرات - لأن هذا يقلل من سرعة تطورك

تنبيه و تحذير كل ما كتب في هذه المدونة عن صفات الأبراج هو من واقع خبراتي ومشاهداتي في تحليل الشخصيات والتعامل مع البشر وليس له علاقة من بعيد أو قريب بالتنجيم أو الفلك أو الحظ أو التنبؤات! والبرج هو الشهر في السنة الشمسية و هي تقابل السنة القمرية و الشهور القمرية, فما أكتبه يشابه أن تكتب التشابه في صفات أبناء بلد معين أو مهنة معينة, فالعلاقة هي المصاحبة (التوقيت) لا أن النجوم تؤثر في الصفات ,و يشابهها أن نقول أن الجيل الفلاني يتصف بكذا و كذا (صفات في داخل فترة زمنية) -         نسبة دقة الكلام المكتوب – في تقديري الشخصي -  حوالي 80% , بمعنى أنه يصدق أو يصيب بنسبة 80% من الناس و 80% من صفاتهم كأفراد -         تشابه الصفات في داخل وقت محدد هو آية من آيات الله عز و جل – وأن الكون كله في تناغم و علم مسبق لله عز وجل صفات الأبراج – لماذا حذفت و لماذا أرجعت المدونة في الرابط التالي: https://blogatee.blogspot.com/2015/10/blog-post.html وفيه كيفية الاستفادة من الأبراج بشكل سليم لمن أراد معرفة تفاصيل وقصة من أين أتيت بالكلام المكتوب في المدونة عن الأبراج طالع البوست في هذا الرابط : حكايتي مع الأبراج https://blogatee.blogspot.com/2008/09/blog-post_04.html لمشاهدة كل الموضوعات في المدونة اضغط على هذا الرابط: http://blogatee.blogspot.com/view/flipcard